අපල
බැහැගෙන යන ඉරේ ලා රත් පාට කිරණ පොදිය, බණ්ඩි ගොයමෙන් බාගයක් යට කරගෙන රැළිති නගන කුඹුරෙ වතුර කඳට වැටිල ලා රතු පාට දිස්නයක් එක්ක ඇස්වල වදිනව. ඈත කළු-කොළ පාට කඳු වළල්ල පැත්තෙන් හමන හීතල හැන්දෑ හුළගින් බෝ ගහේ කොළ පොකුර කණටයි, ඇහැටයි, හිතටයි මිහිරි, 'සිලි සිලි' හඬින් සෙලවෙනව. ඒ මිහිරි සිලි සිලිය, බෝ ගහ දිගට ගැට ගහපු නිල් පාට, කහ පාට, රතු පාට, සුදු පාට කොඩිවැල් පේළිවල වැදිල 'පට පට' ගාල පුපුරනව. 'ක්‍රිශාන්තගේ ග්‍රහ අපල, නිමාලිගේ සෙනසුරු අපල, සංජීවගේ රාහු අපල..' ඒ කොඩිවල කළු පාට කැත අකුරුවලින් ලියල තියෙන හැටිත් හොඳට බැලුවහම පේනව. හඳුන්කූරු අහුරු පිටින් ගහපු හඳුන්කූරු භාජනේ පිසගෙන, අර 'සිලි සිලි' හුළඟ හමනව. යන්තමට සායම් ගිය, පතුරු ගිය, කළු බැඳුන වට්ටිවල පීරිසිවල තියල පූජ කරපු නා නා විධ මල්වල වැදෙන ඒ හුළඟ හෙමිහිට අපේ නාස් පුඩු අතරින් පෙනහළුවලට යනව. ඒ සුවඳට ම රත් වෙච්චි පහන්වල තෙල් සුවඳත් එකතු වෙලා අපූරු සුවඳක් හදනව. 'පන්සල් සුවඳ' කියන්නෙ ඒ සුවඳට!
බෝ මළුවෙ වැලි තලාවෙ හීනි හීනි වැලි කැට කකුල් කිති කවනව. අපේ අඩි පාරවල්, ඇඟිලි පාරවල් වැලි තලාවෙ සටහන් වෙලා කුඹුරෙ වතුර කඳ වගේ ම වැලි තලාවෙත් රැළිති රැළිති පේන්න ගන්නව. ගලවන්න බැරි වුණු කළාඳුරු, උඳුපියලිය පැළ තැන තැන ඉතිරි වෙලා තියෙන බෝ මළුවෙ තැන තැන බැතිමත්තු වැඳගෙන කපුරාළ කියන ගාථා එකින් එක කියනව.
වයස අවුරුදු 45ක් විතර වෙන කපුරාළ සුදු පාට කපු කමීසෙයි සුදු පාට සරමයි ඇඳල පොඩි බංකුවක වාඩි වෙලා බෝධි පූජා කවි කියනව. සුදු කමීසෙ තුනී කම අතරින් එයා සරමට උඩින් බැඳන් ඉන්න කළු පාට පටිය යාන්තමට පේනව. බෝධි පූජා, බුද්ධ පූජා, බහිරව පූජා කරවගත්ත කට්ටිය දීපු සල්ලිවලින් කමීසෙ උඩ සාක්කුව පිරිල තියෙන හැටිත් හොඳට බලද්දී පේනව!
'උඩ මළුවේ බෝ හිමි වැජඹෙනවා...." කපුරාළ උගුරෙයි, නළලෙයි, බෙල්ලෙයි නහර උලුප්පගෙන හයියෙන් කවි කියනව. එකපාරටම කපුරාළගෙ ඉණේ බැඳපු පටිය අස්සෙන් ඉලෙක්ට්‍රොනික හඬක් ඇහෙනව! ඒ හඬ ජනප්‍රිය ආදර ගීයක බව, කපුරාළ කීවාට පසු 'උඩ මළුවේ බෝ හිමි වැජඹෙනවා...." පදය ගයලා, ඊළඟ පදේ කියනකම් කපුරාළ දිහා බලන් ඉන්න බැතිමතුන්ටත් ඇහෙනව. කපුරාළ කලබලේට ඉණ පටියෙ රඳවල තිබුන නවීන ස්මාර්ට් දුරකථනය එලියට අරගෙන අමාරුවෙන් මොකක්දෝ ඔබල කණේ තියාගන්නව!
'හෙලෝ! මං මේ පූජාවක ඉන්නෙ. පස්සෙ ගන්නම්!!!!!' කපුරාළ සද්දෙට කියනව!
බෝ ගහේ කොළවල සිලි සිලියට යටින් සම්බුද්ධත්ව ජයන්තියට පිළිවෙතින් පෙළ ගැසෙමු කියල ලියල තියෙන කොඩි වැල් පේළිය අතරින් බුදු හාමුදුරුවො කරුණාබර හිනාවක් පානව මට පේනව!
පබසර ගුණවර්ධන
ව්‍යවහාරික විද්‍යා පීඨය
සිව වන වසර
